Samstarf milli skólastiga

Í samstarfi milli leikskóla og grunnskóla er stór þáttur að fá elsta hópinn í leikskólanum í heimsókn í grunnskólann þar sem þau fá að kynnast starfsfólki, húsnæði og nemendum.

Í dag var fyrsta heimsóknin á þessu skólaári og kom glaðbeittur hópur í skólann kl. 10 og stoppaði hjá okkur til kl. 12. Þau voru í hópavinnu með 1.bekk, farið var í smá jólaföndur og jólakort útbúin.

Næst koma þau til okkar í janúar og þá í 2 daga.

Við hlökkum til að fá þennan skemmtilega hóp til okkar. Látum nokkrar myndir fylgja með frá heimsókninni í morgun.

FotorCreated

Jólasveinarnir reima á sig skóna

Næstu nótt kemur fyrsti jólasveinninn til byggða, hann Stekkjastaur; Aðfaranótt laugardagsins,  12.12  er dagurinn sem fyrsti jólasveinninn lætur sjá sig nú í ár.

Nú á aðventunni munum við birta ljóð Jóhannesar úr Kötlum um íslensku jólasveinana en engar vísur um þá góðu sveina hafa haft eins mikil áhrif á mótun hugmynda okkar um þá. Áður en Jóhannes samdi vísur sínar, voru margar útgáfur til af þjóðsögunni um jólasveinana en nú efast fáir  um hvaðan þeir koma, hvað þeir heita eða hvað þeir bauka á ferðum sínum. Tryggvi Magnússon myndskreytti bókina ,,Jólin koma“ e. Jóhannes og myndir hans og Ólafs Péturssonar fylgja með þessum færslum okkar.

jolasveinar_100103

Jólasveinarnir

Segja vil ég sögu
af sveinunum þeim,
sem brugðu sér hér forðum
á bæina heim.

Þeir uppi á fjöllum sáust,
– eins og margur veit, –
í langri halarófu
á leið niður í sveit.

Grýla var þeirra móðir
og gaf þeim tröllamjólk,
en pabbinn Leppalúði,
– það var leiðindafólk.

Þeir jólasveinar nefndust,
– um jólin birtust þeir.
Og einn og einn þeir komu,
en aldrei tveir og tveir.

Þeir voru þrettán
þessir heiðursmenn,
sem ekki vildu ónáða
allir í senn.

Að dyrunum þeir læddust
og drógu lokuna úr.
Og einna helzt þeir leituðu
í eldhús og búr.

Lævísir á svipinn
þeir leyndust hér og þar,
til óknyttanna vísir,
ef enginn nærri var.

Og eins, þó einhver sæi,
var ekki hikað við
að hrekkja fólk og trufla
þess heimilisfrið.

Ólafur_jólasveinar_frímerki