Möguleikhúsið – Eldbarnið leiksýning fyrir 1. – 10. bekk

eldbarnid

Föstudaginn 18.september kl. 8:30 fáum við heimsókn frá Möguleikhúsinu, en það mun flytja okkur leiksýninguna „Eldbarnið“.

Hvernig bregst lítil stúlka við þegar veröldin umturnast vegna ógnvænlegra náttúruhamfara?

Sólveig er söguhetjan í þessu nýja leikriti Möguleikhússins. Eftir gríðarlega jarðskjálfta verður stórt eldgos og skömmu seinna steypist hraunstraumur ofan af hálendinu. Sólveig og móðir hennar verða að flýja upp í fjallshlíð, þaðan sem þær horfa á bæinn sinn fara undir hraun. Við tekur ný og gjörbreytt tilvera, flótti og leit að húsaskjóli. Sólveig lendir í ævintýralegum aðstæðum sem hljóma fjarstæðukenndar fyrir íslenskum börnum í dag en voru raunverulegar á þessum tímum.

Hér heldur Möguleikhúsið áfram umfjöllun um mannlíf í kjölfar Skaftárelda og Móðuharðinda, en áður sýndi það einleikinn Eldklerkinn sem hlaut afburðagóðar viðtökur. Að þessu sinni eru atburðirnir skoðaðir frá sjónarhóli ungrar stúlku í nýju barnaleikriti sem ætlað er áhorfendum frá 8 ára aldri.

Sýningin hentar einkar vel fyrir nemendur á miðstigi grunnskóla, ekki síst þeim sem eru að læra um Skaftárelda og Móðuharðindi.

Tónleikar fyrir grunnskólann – „Fiðla og fótstigið“

m_11084003_10153272250766929_3724627896083293647_oFiðla og fótstigið er samstarfsverkefni fiðluleikarans Láru Sóleyjar Jóhannsdóttur og organistans Eyþórs Inga Jónssonar. Um er að ræða fræðandi, skapandi og aðgengilegt tónleikaprógram sem ætlað er nemendum á grunn- og framhaldskólaaldri.

Flutt er tónlist eftir mörg af þekktustu tónskáldum veraldar í nýjum búningi þar sem útsetningar og spuni setja létta, þjóðlega stemmningu og gera tónlistina enn aðgengilegri hlustendum; Mozart á moldargófli, Schubert í sauðskinsskóm, Liszt í lopapeysu, Handel með hangikjöti og Lully lundabaggi eru uppskriftir tónleikanna.

Leikið er á fiðlu og fótstigið orgel, harmoníum. Flytjendur eru í þjóðbúningum og notast jafnframt við skjávarpa þar sem myndum og fræðslu frá viðeigandi tónlistartímabilum er varpað upp. Leitast er við að tónleikagestir taki virkan þátt í tónleikunum meðal annars með söng og klappi.

Um er að ræða sjálfsprottið starf sem stuðlar að fjölbreyttari menningarstarfi sem sniðið er sérstaklega fyrir börn og ungmenni og flutt í þeirra nær umhverfi. Með tónleikunum vilja flytjendur auka áhuga og þekkingu á klassískri tónlist og ala upp hlustendur og leikendur þess konar tónlistar.

Verkefnið hefur fengið frábærar viðtökur og hafa þónokkrir skólar á Eyjafjarðarsvæðinu nú þegar verið heimsóttir. Verkefnið er styrkt af Norðurorku og Akureyrarstofu.

Við hlökkum til að taka á móti þeim Láru og Eyþóri í Þórsver miðvikudaginn 16.september kl. 11:15.